Upprifjun

Ég hef verið að renna yfir gamlar myndir af ferðalögum mínum undanfarin ár og rakst á þessa sem fær mig alltaf til að brosa út í annað þegar ég rifja þessa ferð upp.

Þessi mynd er tekinn af Patrol jeppa sem ég átti þá. Ferðin hafði gengið snurðulaus fyrir sig frá Rvk í Kerlingarfjöll, þaðan í Setur undir Hofsjökli. Aksturinn yfir Hofsjökull  var ekkert vandamál. Það var ekki fyrr enn ég var að renna í hlað í Laugafelli sem árbakki brotnaði undan bílnum hjá mér. 

Þetta þótti mér afskaplega neyðarlegt eftir allt ferðalagið og átti ekki eftir nema eina 100 metra í bílaplanið. Bárður Steinn Jóhannesson var aðstoðarmaður minn í þessari ferð.

Þar sem hann sat farþegameginn í bílnum þegar þetta skeði skipaði ég honum að sitja og hreyfa sig alls ekki þar sem bíllinn myndi velta ef við hreyfðum okkur of mikið, sjálfur skreið ég út um gluggann hjá mér og var afskaplega létt að vera laus úr bílnum. Enn ég stóð og gólaði allan tímann á Bárð að hreyfa sig ekki þangað til hjálp kom  og tók líklega um 30 mín að losa bílinn

Eftir að bíllin var laus rak Bárður mig í farþegasætið og fékk ég ekki að keyra það sem eftir var ferðar. Hann röflaði svo allan leiðina inn á Akureyri um að skipstjórar yfirgæfu ekki sökkvandi skip og skildu hásetana eftir til að deyja.

 

 

Kannski ég setji inn eina og eina mynd á bloggið hjá mér af ferðum mínum og uppákomum.

 

 

Athugasemdir

[Jón Þór 10.1.2009 kl. 01:43]

Þetta finnst mér skemmtilegri lesning en íþróttabloggin, með fullri virðingu fyrir íþróttaskoðunum þínum